ဝါခေါင်လပြည့်နေ့ မေတ္တာအခါတော်နေ့ အခမ်းအနားကို စေတီတော်မြတ်ကြီး ရင်ပြင်တော်ပေါ်ရှိ ကျားပျံဓမ္မာရုံတွင် ကျင်းပမြဲဖြစ်ပါသည်။ အခမ်းအနားသို့ ဂေါပကအဖွဲ့ ဩဝါဒါစရိယဆရာတော်ကြီးများ ကြွရောက်တော်မူကြပြီး သီလတော်များ ချီးမြှင့်ခြင်းနှင့်အတူ မေတ္တာအခါတော်နေ့ဖြစ်ပေါ်လာပုံ သိကောင်းစရာများကို ဟောကြားပေးတော်မူပါသည်။ အခမ်းအနားမှ ဆရာတော်ကြီးများ ပြန်လည်ကြွတော်မူပြီးနောက် ဂေါပကအဖွဲ့ဝင်များ၊ ဝေယျာဝစ္စ (၇)ဖွဲ့မှ အဖွဲ့ဝင်များ၊ ရပ်ကွက်နှင့်အစိုးရရုံးဌာနဆိုင်ရာ ဝတ်အသင်း (၆၃)သင်းတို့က စေတီတော်မြတ်ကြီး ရင်ပြင်တော်တွင် စေတီတော်ကြီးကို ဝိုင်းရံကာ မေတ္တာသုတ်တော် ရွတ်ဖတ်ပူဇော်ခြင်းနှင့်အတူ ဒိသာဖရဏမေတ္တာပို့ခြင်းများဖြင့် အခမ်းအနားကို စည်ကားသိုက်မြိုက်စွာ နှစ်စဉ်ကျင်းပမြဲဖြစ်သည်။