‘ဝ’ လေးလုံးစေတီတော်
ရွှေဆံတော်စေတီတော် အင်္ဂါထောင့်၊ ဗုဒ္ဓံ ဓမ္မံ သံဃံ ဝါတွင်းနိဗ္ဗာန်ဆော်အဖွဲ့ တည်ရှိရာ ဒေါ်စောရင်ဓမ္မာရုံတန်ဆောင်း အရှေ့ဘက်တွင် ကပ်လျက်‘ဝ’လေးလုံး စေတီငယ်ကို ဖူးတွေ့ရမည်ဖြစ်ပါသည်။ ခရစ်နှစ် ၁၉၅၃ ခုနှစ်တွင် ကောင်းမှုရှင် တစ်ဦးက ကိုးနဝင်းကျေ ‘ဝ’ လေးလုံးစေတီကို တည်ထား ခဲ့ပါသည်။ စေတီငယ် တည်ဆောက်ပုံမှာ ပစ္စယာငယ်တစ်ဆင့်ခံပြီး ယင်းပစ္စယာပေါ်၌ ‘ဝ’ အက္ခရာ လေးလုံး ကြီးစဉ်ငယ်လိုက် တစ်ကွင်းစီပတ်ခွေထားသည့် အပေါ်မှ စေတီလုံး တည်ထားခြင်းဖြစ်သည်။ ‘ဝ’ ကွင်းလေးကွင်း ပေါ်တွင် စေတီတည်ထား ခြင်းကြောင့် ‘ဝ’ လေးလုံးစေတီဟူ၍ လူသိများ ထင်ရှား လှပေသည်။ ‘ဝ’ လေးလုံးစေတီလုံးပြည့် ရွှေသင်္ကန်းကပ်လှူခြင်း၊ စေတီငယ်ရင်ပြင်ပတ်လည်နှင့် ဂြိုဟ် (၈) ခွင်တို့တွင် သန့်ရှင်းကြည်လင် တင့်တယ်လှပနေစေရန် ကြွေကျောက်ပြား များအပြည့်ကပ်၍ လှူဒန်းခြင်းကို ရန်ကုန်မြို့၊ အလုံရပ်၊ နှင်းဆီလမ်း၊ အမှတ်(၅၅)နေ ဦးမြတ်ကြည်+ဒေါ်အေးအေးမာ မိသားစုက ပြုလုပ်လှူဒါန်းကြပါသည်။ အဓိဌာန်ပုတီးစိပ်သူများ၊ တရားထိုင်သူများနှင့် စည်ကားနေသလို ဂမ္ဘီရပုဂ္ဂိုလ်များ အဓိဌာန်ပုတီးစိပ်ရာ ပြည်ဝင် ပြည်ထွက် အောင်မြေအထူးဌာနလည်းဖြစ်ပါသည်။(မိမိမွေးနံအလိုက်ထိုင်၍ ပုတီးသက်စေ့ နှစ်သက်ရာ ဂါထာဖြင့် စိပ်ကြသည်။ လောကီလောကုတ္တရာ လိုရာဆုတောင်း ကြ၏။)
Developed by University of Computer Studies,Pyay