စတုတ္ထအောင်မြေ
အောင်မြေဌာန- သစ္စာဓိဋ္ဌာန်အောင်မြေ(ခြေရာတစ်တောင်မောင်မဲခေါင်လိုဏ်ဂူ)
တည်ရှိရာနေရာ- ရွှေဆံတော် စေတီတော် အရှေ့ယွန်းယွန်း၊ အရှေ့ဘက် စောင်းတန်းထိပ်၊ တောင်ဘက်၌ တည်ရှိသည်။ ခြေရာတစ်တောင် မောင်မဲခေါင် လိုဏ်ဂူ၊ ဘယ်ညာအမှန် ခွဲ၍ အမျိုးသားညာဘက်၊ အမျိုးသမီး ဘယ်ဘက်၌ အဓိဋ္ဌာန်ဝင် သစ္စာဆိုရသည်။ခြေရာတစ်တောင် မောင်မဲခေါင် အဓိဌာန်ဂူ ဖြစ်သည်။ဂူအမိုးပေါ်တွင် ပုဂံရွှေစည်းခုံပုံတော် စေတီငယ် တစ်ဆူ တည်ထားသည်။ ထိုစေတီငယ်၏အလှူရှင်မှာ ပြည်မြို့၊လမ်းမတော်လမ်းနေ၊ ရွှေဦးလူကလေး+ ဒေါ်သိန်းချစ် နှင့် သားသမီးမြေးတစ်စုတို့ ဖြစ်သည်။ သာသနာတော်နှစ် ၁၈၃၄၊ ပုဂံသက္ကရာဇ် ၆၅၈၊ ခရစ်နှစ် ၁၂၉၆၊ တန်ဆောင်မုန်း လဆန်း(၁၀)ရက် ရွှေဆံတော် ဘုရားပွဲတော်ကျင်းပနေစဉ် ပြည်ဘုရား ကျစွာမင်း၏ ဖိတ်ကြားချက်အရ သာယာဝတီ ဘုရင်သတိုးနော်ရထာ သုံးမြို့ရှင်သည် ဆင်တော်လော်ရှိန်းစီး၍ လူစွမ်းကောင်း ကိုယ်ရံတော်ဗိုလ်မှူး ဟတ္တိဇေယျဗလဘွဲ့ခံ မောင်မဲခေါင်နှင့်အတူ ပြည်ရွှေဆံတော်သို့ အဖူးမြော် ရောက်သည်။ရှေးမင်းများ တက်ရောက်ကြရာ အရှေ့ဘက်စောင်းတန်းမှ တက်ရောက်၍ ရင်ပြင်တော်ပေါ်ရှိ အရှေ့ဘက်အာရုံခံတန်ဆောင်းမှ ရွှေဆံတော် စေတီတော် မြတ်ကြီးအား ဖူးမြော်ကြည်ညိုသည်။ဗိုလ်မှူးမောင်မဲခေါင်လည်း ဘုရားကြည်ညိုသည်။ ထို့နောက် မိမိရည်မှန်းချက်များ အောင်မြင်ပြီး သာသနာပြု ပုဂ္ဂိုလ်ကျော်မှန်ကန်ပါက မိမိခြေရာသည်ဤနေရာ၌ ထင်ပါစေသား ဟု အဓိဌာန် ပြုသည်။အဓိဌာန်ပြုသည့်အတိုင်း တစ်တောင်ခန့်ရှိသော ခြေရာနှစ်ခုသည် ကျောက်သားပေါ်တွင် ပကတိ ထင်သည်။ ယခု ကျောက်သားပေါ်တွင် ထင်ကျန်ရစ်သည့် ခြေရာနှစ်ခုနေရာကို ကျောက်အင်္ဂတေ တို့ဖြင့် ဖုံးအုပ်၍ ခြေရာတုနှစ်ခုပြုလုပ်ထားသည်။ယင်းခြေရာပေါ်မှ လှိုဏ်ဂူကို တည်ဆောက် ကာ လှိုဏ်ဂူပေါ်တွင် ရွှေစည်းခုံ ပုံစေတီငယ်ကို တည်ထားခြင်းဖြစ်သည်။ခြေရာတစ်တောင်မောင်မဲခေါင်အဓိဌာန်ဂူသည် အနောက်ဘက်သို့ မုခ်ဦးလှည့်ထားသည့် တစ်ဝဂူ ပုံစံမျိုးဖြစ်သည်။သာသနာ့နုဂ္ဂဟ အသင်းတော် တည်ရှိရာ ရွှေဦးလူကလေးဓမ္မာရုံအတွင်း မှတဆင့် ဂူအတွင်းသို့ ဝင်သွားနိုင်သည်။လှိုင်ဂူအတွင်း၌ ဗုဒ္ဓဆင်းတုတော်မြတ်(၃)ဆူ သီတင်း သုံးတော်မူပေသည်။ ဗုဒ္ဓရုပ်ပွားတော်မြတ်တို့၏ရှေ့၌ ကျောက်အင်္ဂတေဖြင့်ပြုလုပ်ထားသော ခြေရာကြီးနှစ်ခု တွေ့ရမည်။ခြေရာပုံစံ တစ်ခုသည် ယောင်္ကျားကြီးတစ်ယောက်က တင်ပျဉ်ခွေ လျက် ကောင်းကောင်းထိုင်နိုင်သည်။ ခြေရာပုံပေါ်တွင် တင်ပျဉ် ခွေထိုင်ပြီး ပုတီးစိတ်နေသူတို့ကို တွေ့ခဲ့ရသည်။
Developed by University of Computer Studies,Pyay